Comments Off

ccpស្នើចរចាជាមួយcnrp រឿងកំណែទម្រង់បោះឆ្នោត

ភ្នំពេញ: គណបក្ស​ប្រជាជន​កម្ពុជា នៅ​ថ្ងៃទី​១៣ ខែកុម្ភៈ ឆ្នាំ​២០១៤​បានចេញ​សេចក្តីថ្លែងការណ៍​ឆ្លើយតប​នឹង​គណបក្ស​សង្គ្រោះ​ជាតិ ជុំវិញ​ការបង្កើត​គណៈកម្មការ​របស់​រាជរដ្ឋាភិបាល ដើម្បី​សិក្សា​ស្រាវជ្រាវ​កែទម្រង់​ការបោះឆ្នោត​។ កំណែទម្រង់​ការបោះឆ្នោត ដែល​គណបក្ស​ប្រជាជន​កម្ពុជា​ចាត់ទុកថា​ជា​កិច្ចដំណើរការ​ដែល​ធ្លាប់បាន​អនុវត្ត​ជា​បន្តបន្ទាប់​កន្លងទៅ​និង​ជា​កំណែទម្រង់​ដ៏​ស្មុគស្មាញ ដែល​ទាមទារ​ពេលវេលា ដោយ​មិនអាច​អូសបន្លាយ​ពេលវេលា​តទៅ​ទៀត​បានឡើយ​។​

​សេចក្តីថ្លែងការណ៍​រប​ស់​គណបក្ស​ប្រជាជន​កម្ពុជា បាន​បង្ហាញថា ក្នុងការ​ជួបចរចា​ក​ន្ល​ង​មក គណបក្ស​សង្គ្រោះ​ជាតិ បាន​ផ្លាស់ប្តូរ​ប្រធានបទ​និង​លក្ខខណ្ឌ​នៃ​ការទាមទារ​ជា​បន្តបន្ទាប់​ជាហេតុ​ធ្វើ​ឲ្យ​ការពិភាក្សា​អំពី​កិច្ចដំណើរការ​កំណែទម្រង់​ការបោះឆ្នោត ត្រូវបាន​អូសបន្លាយរ​ហូត​មកទល់​បច្ចុប្បន្ន​នេះ​។​

​សេចក្តីថ្លែងការណ៍ ដែល​បាន​ផ្សព្វផ្សាយ​ដល់​អ្នកកាសែត នៅ​រសៀល​ថ្ងៃទី​១៣ ខែកុម្ភៈ​នេះ បង្ហាញថា ការបង្កើត​គណៈកម្មកា​រ​របស់​រាជ​រដ្ឋ​ភិ​បាល ដែល​កើតចេញពី​គណបក្ស​ប្រជាជន​កម្ពុជា ដើម្បី​សិក្សា​ស្រាវជ្រាវ​អំពី​ជម្រើស​នានា ក្នុង​ដំណើរការ​កំណែ​ទម្រង់កា​របោះ​ឆ្នោត គឺជា​ការបង្ហាញ​នូវ​ឆន្ទៈ​ដ៏​ពិតប្រាកដ​របស់ខ្លួន ក្នុង​ការបន្ត​កិច្ចដំណើរការ​កំណែទម្រង់​ដ៏​មាន​សារៈសំខាន់​នេះ​។​

​ក្នុងន័យនេះ គណបក្ស​ប្រជាជន​កម្ពុជា បាន​គូសបញ្ជាក់ថា សូម​ស្វាគមន៍ និង​ស្នើសុំ​គណបក្ស​សង្គ្រោះ​ជាតិ ចាត់​តំណាង​របស់ខ្លួន ជួបចរចា​ជាមួយ​តំណាង​គណបក្ស​ប្រជាជន​កម្ពុជា ដើម្បី​រៀបចំ​យន្តការ​មួយ សម្រាប់​កិច្ចដំណើរការ​កំណែទម្រង់​ការបោះឆ្នោត នាពេលខាងមុខ តាម​ស្មារតី​នៃ​កិច្ចប្រជុំ​កំពូល​រវាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ កាលពី​ថ្ងៃទី​១៦ ខែកញ្ញា ឆ្នាំ​២០១៣​។​

​ជាការ​កត់សម្គាល់ កាលពី​ថ្ងៃទី​១២ ខែកុម្ភៈ ឆ្នាំ​២០១៤ គណបក្ស​សង្គ្រោះ​ជាតិ បានចេញ​សេចក្តីថ្លែងការណ៍ ដោយ​សម្តែង​ការសោកស្តាយ​ចំពោះ​ការចេញ​សេចក្តីសម្រេច​របស់​រាជ​រដ្ឋាភិបាល ដឹកនាំ​ដោយ​គណបក្ស​ប្រជាជន​កម្ពុជា ស្តីពី ការបង្កើត​គណៈកម្មកា​រ​សិក្សា​ស្រាវជ្រាវ កែទម្រង់​លើ​ការបោះឆ្នោត ដែលមាន​សមាសភាព​ម​ក​ពី​គណបក្ស​ប្រជាជន​កម្ពុជា​ទាំងអស់​។​

​ក្នុង​សេចក្តីថ្លែងការណ៍ គណបក្ស​សង្គ្រោះ​ជាតិ ស្នើសុំ​ឲ្យ​បង្កើត​គណៈកម្មការ​រួម​មួយ ដែលមាន​សមាសភាព​ស្នើ​គ្នា មកពី​គណបក្ស​សង្គ្រោះ​ជាតិ និង​គណបក្ស​ប្រជាជន​កម្ពុជា ស្របតាម​ស្មារតី​នៃ​សេចក្តីប្រកាស​រួម​នៃ​ជំនួប​កំពូល ថ្ងៃទី​១៦ ខែកញ្ញា ឆ្នាំ​២០១៣ ដើម្បី​សិក្សា​ស្រាវជ្រាវ លើ​ការកែទម្រង់​ការបោះឆ្នោត​។​

​គណបក្ស​សង្គ្រោះ​ជាតិ ក៏បាន​អំពាវនាវ​ឲ្យ​មានការ​ចូលរួម​យ៉ាង​ទូលំទូលាយ ពិសេស​ពី​សំណាក់​សង្គម​ស៊ីវិល អង្គការ​អន្តរជាតិ និង​ដៃគូ​អភិវឌ្ឍន៍​នានា ដែល​បានធ្វើការ​ស្រាវជ្រាវ មានបទពិសោធន៍ និង​ធ្លាប់​បានផ្តល់​អនុសាសន៍​នានា ពាក់ព័ន្ធ​នឹង​ការបោះឆ្នោត ដើម្បី​ជំរុញ​ឲ្យ​យន្តការ​កែទម្រង់​ការបោះ​ឆ្នោត ប្រព្រឹត្ត​ទៅដោយ​រលូន និង​មានដំណើរ​ការ​លឿន​ទៅមុខ និង​អាច​ទទួលយកបាន​ពី​គ្រប់ភាគី​ពាក់ព័ន្ធ​នានា ក្នុង​គោលដៅ​ធានា​ឲ្យ​ការរៀបចំ​បោះឆ្នោត​លើក​ក្រោយ​ទៀត ប្រព្រឹត្ត​ទៅដោយ​សេរី ត្រឹមត្រូវ និង​យុត្តិធម៌ ស្របតាម​ស្តង់ដារ​អន្តរជាតិ​។​

315

Filed in: នយោបាយ

Recent Posts

Bookmark and Promote!